(ఈరోజు ప్రతినిధి-విశాఖపట్నం)
నాన్ ఎక్కడ పుట్టిందంటే..ఈ నాన్ పర్షియన్ దేశంలో పుట్టిందని చెబుతారు. పర్షియన్ భాషలో "నాన్" అంటే సాధారణంగా "రొట్టె" అని అర్థం. దాదాపు 2,500 ఏళ్ల క్రితం పర్షియాలో మొదలైంది. తొలుత దీనిని వేడి గులకరాళ్లపై కాల్చేవారని చెబుతారు. సాధారణ రొట్టెలగా పుట్టి భారత్ లోకి ప్రవేశించిన తరువాత అది కాస్తా బట్టర్ నాన్ గా స్థిరపడింది. అలా దీని ప్రస్థానం మొదలైంది. 13వ శతాబ్దంలో ఢిల్లీ సుల్తానుల కాలంలో ఈస్ట్ (పులియబెట్టే ప్రక్రియ) ద్వారా దీనిని తయారు చేసేవారట. అప్పట్లో రాళ్లపై కాల్చిన విధానం కాస్తా తందూర్ పొయ్యిలవరకూ వచ్చింది.. అవే తందూర్ లతో ఈ.. నాన్ భారత ఉపఖండానికి చేరిందట. ఈ నాన్ మొదటి చారిత్రక ఆధారం... క్రీ.శ. 1300 ప్రాంతంలో ప్రముఖ కవి అమీర్ ఖుస్రో తన రచనల్లో ఢిల్లీ రాజదర్బారులో వడ్డించే రెండు రకాల నాన్ల గురించి పేర్కొన్నారు. అవి పలుచని "నాన్-ఎ-తునుక్", తందూర్లో కాల్చే మందపాటి "నాన్-ఎ-తనూరి" విధానం కూడా ఆ రచనల్లో పొందుపరిచారు. అంతేకాకుండా
మొఘ లుల కాలంలో నాన్ కి చాలా పెద్ద రాజభోగం లభించింది. 16వ శతాబ్దంలో మొఘల్ చక్రవర్తుల కాలంలో నాన్ తయారీ ఒక గొప్ప పాకకళగా ఇది ఖ్యాతి పొందినది. పిండిని పులియబెట్టడం, పాలు, పెరుగు, నెయ్యి కలపడం ఖర్చుతో కూడుకున్న పని కావడంతో అప్పట్లో ఇది కేవలం రాజులు, ఉన్నత వర్గాలవారే తినేవారట. రాజుల ఇలాకాల్లో దీనిని అధికంగా తయారు చేసినట్టు చరిత్ర చెబుతుంది.
-ఇక భారత దేశంలో బట్టర్ నాన్ ఆవిర్భావం..
పర్యషన్ దేశం నుంచి భారత్ లోకి సుల్తానులు వ్యాపారం చేయడానికి వచ్చే క్రమంలో భారత దేశంలో కూడా ఈ నాన్ లు తయారు చేయడం మొదలు పెట్టడంతో.. భారత్ లో ఈ నాన్ వంటకం భారత్ లోకి కూడా ప్రవేశించిందని చెబుతారు. ఆ తరువాత రాళ్లపై కాల్చే విధానం కాస్తా కాలక్రమేణా తందూర్ పొయ్యులు సామాన్యులకు అందుబాటులోకి వచ్చాయి. తందూర్లో కాల్చిన వేడి నాన్పై వెన్న (బటర్) లేదా నెయ్యి రాసి వడ్డించే పద్ధతి ఉత్తర భారతదేశంలోని రెస్టారెంట్లు, దాబాలలో బాగా ప్రాచుర్యం పొంది "బట్టర్ నాన్"గా స్థిరపడింది. అప్పటి నుంచి ఇప్పటి వరకూ నాన్ ఒక ఇష్టమైన భారతీయ ఆహారమంటే అతిశకయోక్తి కాదేమో. ఇపుడు తెలిసిందా బట్టర్ నాన్ హిస్టరీ..?
-రెస్టారెంట్ స్టైల్ బట్టన్ నాన్ తయారీ విధానం
బటర్ నాన్ కి కావాల్సిన పదార్థాలు:
1) మైదా: 1.5 కప్పులు
2) పెరుగు: పావు కప్పు
3) బేకింగ్ సోడా: అర చెంచా
4) చక్కెర: అర చెంచా
5) ఉప్పు: తగినంత
6) నూనె: కొద్దిగా
7) వెన్న : తగినంత
8) నీరు: పిండి తడుపుకోవడానికి సరిపడా
ఉత్తర భారతీయ వంటకాలలో , రెస్టారెంట్లలో పనీర్ కర్రీస్, నాన్-వెజ్ గ్రేవీలతో నంజుకుని తినే ప్రసిద్ధ రొట్టె 'బటర్ నాన్'. సాధారణంగా బటర్ నాన్ అనగానే రెస్టారెంట్లలో పెద్ద పెద్ద తందూర్లలో కాలుస్తుంటారు. అయితే ఇంట్లో తందూర్ లేకపోయినా మన ఇంట్లోని మామూలు పెనం పైనే అచ్చం రెస్టారెంట్ స్టైల్ దూదిలాంటి మెత్తటి బటర్ నాన్లను ఎంతో సులభంగా తయారు చేసుకోవచ్చు. ఈ బటర్ నాన్ తయారీకి ముందుగా ఒక పాత్రలో ఒకటిన్నర కప్పుల మైదా పిండి తీసుకోవాలి. అందులో పావు కప్పు కమ్మటి పెరుగు, అర టీస్పూన్ బేకింగ్ సోడా, అర టీస్పూన్ పంచదార, అర టీస్పూన్ ఉప్పు వేసి కలపాలి. ముందుగా పిండిని పెరుగులోనే బాగా కలిపి, ఆ తర్వాత కొద్దికొద్దిగా నీళ్లు పోస్తూ చపాతి పిండి కంటే కాస్త జిగురుగా ఉండేలా తడుపుకోవాలి. ఆ తర్వాత కొద్దిగా నూనె వేసి పిండిని కనీసం 5 నిమిషాల పాటు బాగా ఒత్తుకోవాలి. పిండిని ఎంత బాగా ఒత్తితే నాన్ అంత మెత్తగా వస్తుంది. తర్వాత పిండిని సమాన భాగాలుగా బాల్స్లా చేసి, పైన ఆయిల్ రాసి తడి గుడ్డ కప్పి 30 నిమిషాల పాటు పక్కన ఉంచాలి . నానిన పిండి ముద్దను తీసుకుని చేత్తో ఒత్తుకుంటూ లేదా చేతులతో సాగదీస్తూ పర్ఫెక్ట్ నాన్ షేప్లో ఒత్తుకోవాలి. ఇప్పుడు నాన్ కి ఒకవైపు భాగాన నీటితో బాగా తడి చేయాలి. నీళ్లు తడిపిన వైపు భాగాన్ని బాగా కాలిన పెనం మీద వేయాలి. సన్నటి మంటపై ఒక నిమిషం కాాలాక, పెనాన్ని తిరగేసి గ్యాస్ ఫ్లేమ్పై నాన్ను అన్ని వైపులా కాల్చుకోవాలి. రెండు వైపులా గోల్డెన్ బ్రౌన్ స్పాట్స్ వచ్చాక బయటకు తీసి, వేడి మీద ఉన్నప్పుడే వెన్న (మెల్టెడ్ బటర్) అప్లై చేస్తే కమ్మటి బటర్ నాన్ సిద్ధమవుతుంది.
-ఈ కర్రీలతో బటర్ నాన్ తింటే ఆహా అనాల్సిందే..
బట్టర్ నాన్ లోకి ఎలాంటి కర్రీ అయినా సెట్ అవుతుంది. అయితే ముఖ్యంగా తినే కర్రీల్లో చికెన్ కుర్మా, మటన్ కర్రీ, వెజ్ కడాయ్, దాల్ మఖనీ, దాల్ ఫ్రై బాగా సైడ్ డిష్ గా ప్రాచుర్యం పొందాయి. సాధారణ కూరల్లోకి అంతగా బట్టర్ నాన్ రుచించదు ఆహార ప్రియులకు. అందుకోసం ప్రత్యేకంగా కర్రీలు చేయించుకొని మరీ ఈ బట్టర్ నాన్ లను ఆశ్వాదిస్తూ తింటారు. నాన్ వెజ్ తినని వారు జీడిపప్పు పన్నీకర్రీ, దాల్ ఫ్రై, దాల్ మఖనీ, కడాయ్ వెజ్, మష్రూమ్ కర్రీలు బాగా ఇష్టంగా తింటారు. అదే నాన్ వెజ్ ప్రియులైతే చికెన్ కుర్మా, మటన్ కర్రీ, ఎగ్ బుర్జీ, చికెన్ గ్రేవీ, మరికొంత మంది మటన్ తలకూర, లివర్, ఫ్రాన్స్ కర్రీల కాంబినేషన్ తో కూడా తింటారు. ఒకప్పుడు కేవలం పట్టణాల్లో రెస్టారెంట్ లలో మాత్రమే దొరికే ఈ ఐటమ్ ఇపుడు అన్ని ప్రాంతాల్లోనూ దొరుకుతుంది. మేము చెప్పిన విధంగా ట్రైచేస్తే మీరూ ఇంట్లో బట్టర్ నాన్ లను తయారు చేసుకొని మంచి వెజ్ అండ్ నాన్ వెజ్ కర్రీలతో ఎంజాయ్ చేయవచ్చు..!




