పోలవరం ప్రకృతి అందాలకు పర్యాటకులు ఫిదా..!

పోలవరం జిల్లా అందాలు ఇపుడు నెట్టింట తెగ వైరల్ అవుతున్నాయి..జిల్లాలోని ప్రకృతి అందాలు పర్యాటకులను విశేషంగా ఆకర్షిస్తున్నాయి.. వారు చూసిన అందాలన్నీ ఫోన్లలో బంధించి తాము పోలవరం అందాలకు ఫిదా అయిపోతున్నామంటూ కామెంట్లు పెడుతున్నారు.. నూతనంగా ఏర్పడ్డ పోలవరం జిల్లాను పర్యాటక పరంగా ప్రమోట్ చేయడానికి జిల్లా కలెక్టర్ చేపట్టిన సోషల్ మీడియా ప్రమోషన్ ఇపుడు మంచి ఫలితాలను ఇస్తోంది.. జిల్లాలోని మారేడుమిల్లి, చింతూరు ప్రాంతాల్లోని ప్రకృతి అందాల ఫోటోలు.. వీడియోలు ఇపుడు అన్ని సోషల్ మీడియా గ్రూపుల్లోనూ చక్కర్లు కొడుతున్నాయి.. అందులోనూ చలి కాలం కావడంతో పర్యాటకులు అందరూ పోలవరానికి పయనం అవుతున్నారు.. పోలవరం అందాలను మేము చూస్తామంటూ వాట్సప్ స్టేటస్ లు పెడుతూ వారు చూసిన ప్రదేశాలను చక్కగా ప్రమోట్ చేస్తున్నారు..

పోలవరం ఏజెన్సీ ప్రాంతాన్ని మంచు దుప్పటి కప్పేసింది. ఎటు చూసినా తెల్లటి పొగమంచు పరుచుకుని ప్రకృతి అందాలు పర్యాటకులను కట్టిపడేస్తున్నాయి. కొండలు, గుట్టలు, పచ్చని అడవుల మధ్య మంచు తెరలు కనువిందు చేస్తున్నాయి. చల్లని గాలులు.. మబ్బులతో నిండిన కొండలు.. మంచు తెరల మధ్య నుంచి తొంగిచూస్తున్న సూర్యకిరణాలు ప్రకృతి ప్రేమికులను మైమరిపిస్తున్నాయి. దీంతో మారేడుమిల్లి, చింతూరు ఘాట్ రోడ్లకు విహారయాత్రికుల తాకిడి పెరుగుతోంది. పోలవరం జిల్లా ఏజెన్సీ ప్రాంతంలో గత వారం రోజులుగా చలి తీవ్రత పెరిగింది. తెల్లవారుజామున నుంచి ఉదయం 9 గంటల వరకు అనేక గ్రామాలను దట్టమైన పొగమంచు కప్పేస్తోంది. కొండలు, గుట్టలు, లోయలు, పచ్చని అటవీ ప్రాంతాలు మంచు తెరల మధ్య కనువిందు చేస్తున్నాయి. ప్రకృతి ఒడిలోని గిరిజన గ్రామాలు మంచు అందాలతో కొత్త శోభను సంతరించుకుంటున్నాయి. మరోవైపు మంచు అందాలను వీక్షించేందుకు పర్యాటకులు మారేడుమిల్లి, చింతూరు ఘాట్ రోడ్లకు పెద్ద సంఖ్యలో చేరుకుంటున్నారు. ఘాట్ రోడ్డులోని వ్యూ పాయింట్ల నుంచి మంచు తెరల మధ్య కనిపించే కొండలు, లోయల అందాలను వీక్షిస్తూ పర్యాటకులు మైమరచిపోతున్నారు. చల్లని గాలులు, పొగమంచు మధ్య ప్రకృతి అందాలను తమ సెల్‌ఫోన్లలో బంధిస్తున్నారు. ముఖ్యంగా తెల్లవారుజామున మంచు తెరల మధ్య నుంచి సూర్యకిరణాలు ప్రసరించే దృశ్యాలు పర్యాటకులను విశేషంగా ఆకట్టుకుంటున్నాయి. మొత్తంగా శీతాకాలం ఆరంభంలోనే పోలవరం ఏజెన్సీ ప్రాంతం ప్రకృతి అందాలకు కేరాఫ్‌గా మారి పర్యాటకులను విశేషంగా ఆకర్షిస్తోంది.

పోలవరం జిల్లాలోని ప్రకృతి అందాలను ఆశ్వాదించడానికి ఈ చలికాలంలో అందరూ రావాలి.. ఇక్కడి అందాలను చూసి ఆనందించాలి..సినిమాల్లో మాత్రమే చూసే పోలవరం జిల్లా అందాలను స్వయంగా చూసి ఆ అనుభూతులను మీరు మీ పర్యాటక ప్రపంచంలో భాగస్వాములను చేసుకోవాలంటూ జిల్లా కలెక్టర్ కె. దినేష్ కుమార్ పర్యాటకులకు స్వాగతం పలుకుతున్నారు. అంతేకాకుండా జిల్లాలోని అన్ని పర్యాటక ప్రాంతాలను అభివృద్ధి చేస్తున్నామని.. మరింత సుందరంగా తీర్చిదిద్దేందుకు చర్యలు తీసుకుంటున్నామని కూడా చెబుతున్నారు. ఆంధ్రప్రదేశ్ పర్యాటకంలో ఇపుడు పోలవరం జిల్లా ఒక ప్రత్యేక స్థానంలో నిలబెట్టాలంటే అది పర్యాటకుల వలనే సాధ్యపడుతుందని.. దానికోసం ఇక్కడి అందాలను తిలకించడానికి పర్యాటకులు విశేషంగా తరలి రావాలని కూడా జిల్లా కలెక్టర్ దినేష్ కుమార్ కోరుతున్నారు.